5個重點揀好用露營背囊

  • 2016-09-14
  • 8172

想話買背囊,諗掂上次果4W1H (文章: 迎接Wildcamp季節! 買露營背囊先諗5個問題),大致決定到想買咩Size啦,咁又到下一步,就係了解背長、負荷系統、散熱系統同埋有咩貼心方便嘅設計!

背長尺寸

筆者有個悲慘嘅經驗,揹左個背長太大嘅背囊去行山,背囊個底去到個Pat度,唔舒服唔在講,落斜果陣個背囊底好容易會卡住喺石上面,易磨穿都事小,咁樣失平衡跌一野就冇愁報了,從此對背長尺寸嘅重視程度大大提升。


(今次為我地示範及講解嘅阿So)



所以度背係好重要嘅一環,由頸椎去到盤骨嘅長度就係你個Back size了,雖然理論上自己都喺屋企都可以度,不過Outdoor shop 都有由品牌提供嘅度背尺,咁就萬無一失了。

負荷系統

上文提過幾次嘅負荷系統係影響一個背囊舒適感同埋行到幾遠嘅一大原因,一攞上手最基本已經可以Feel到肩帶彎度係咪乎合人體工學,另外就係肩帶厚度同彈性有冇提供足夠緩衝,緩衝唔足夠,Camp完返到屋企一照鏡可能會見到瘀左同埋痛幾日,咁就可能係負荷系統做得唔夠好。

另外隨住每次露營負重及Pack袋情況嘅不同,背囊的各個位置是否有調校長短亦係十分重要。

一個好嘅背囊應該可以張60-70%重量攤分至腰部,另外的30-40%則由肩部承擔,所以購買露營背囊時務必要求放入預計一次旅程嘅重量揹上身,親身Feel到啱先至出手!




(AETHER 60)

市面上有度身訂造腰帶嘅服務,就係用熱力令腰帶軟化,再由用家親身佩帶等佢慢慢冷卻成形,完全複製左自身腰部同盤骨嘅形狀,自然令重量分佈更加平均。

散熱系統


(AETHER 60)

講完大細、負重,仲有一樣背囊黎講十分之緊要嘅就係散熱系統,同十幾年前相比,而家嘅露營背囊好重視散熱系統,一方面背囊講求貼背,因為愈貼背會揹得愈舒服,不過當行到成身大汗,唔只整濕個袋,仲風吹都唔入果下真係有苦自己知。所以網面或者蜂窩面亦廣泛地被採用,貼背之餘都保留左一啲空間去散熱排汗。以Osprey為例,部份背囊採用AirScape Suspension背負系統,以快速散熱的菱紋散氣背網,貼合身型之餘更可以持續提供舒適感,除左背脊,肩帶亦係同人體嘅其中一個接觸面,系統採用蜂巢狀透氣網布,大幅度增加左透氣度。

貼心設計

另外,作為去露營必備嘅露營用途,唔同嘅品牌都有加入一啲獨特而貼心嘅設計,又或者係附加小工具,呢啲設計就好似手拍甲咁,冇左冇話唔得,不過有就好方便。




(AETHER 60)

部份背囊腰帶備有拉鏈袋,用黎放八達通同Power Gel 之類十分方便,我諗冇人鐘意買個麵包都要除左個背囊攞銀包呱。

胸扣設有哨子,有咩E郁都可以第一時間求救。同埋,應該唔會唔記得帶。

萬一主要儲物空間容量唔夠就又要帶多啲野,其實都仲可以美式玩法即係背囊外再僭建嘅。除左土法綁喺背囊外面,更有啲專用小背囊設計可以完美增加儲物空間,獨立使用可用黎去Day trip或者攻頂包都得。



另外攻頂包黎講,仲有呢種個頂袋可以拆出黎做腰包嘅款色,啱哂一物多用嘅野外原則!

保用承諾


愈來愈多大品牌提供長時間甚至永久嘅保用服務,一來顯示左佢地對自己產品幾有信心,二來真係比到買家一個放心,雖然唔可能你自己攞開山刀劈開個背囊一半都仲保比你,不過起碼品質出左問題導致用唔到都有得整,至於詳細保用條款,買之前一定要問清楚

PS. 露營背囊變奏




(POCO AG™ PLUS / MERIDIAN 60L/22)

香港開始流行重裝玩法,而車Camp嘅營地又冇幾多個,不妨就考慮下拉車仔去玩,呢種露營專用嘅有轆背囊既可以拉喼咁拉,仲可以伸條帶出黎當背囊咁揹,就可以拖行完石屎路再揹上身行山路,前面仲可以拆出黎做個小背囊,又可以做埋攻頂包,而且個Size仲可以Hand carry上機,所以用黎去旅行都一樣方便。

另外揹個小朋友上山逼佢露營都係重裝玩法之一,話哂一個B都有幾十磅,仲要提供最好嘅保護比佢,所以就出現左呢種揹仔背囊喇~

最後祝大家買到個好嘅露營背囊慢慢玩。

#上文部份產品價格:

POCO AG™ PLUS - $2,690
MERIDIAN 60L/22” - $2,750
AETHER 60 - $2,190

產品示範: Re:echo 阿So

更多同類潮物



  • 訂閱內容

Top