呢個網我由細睇到大! 六個來自二千年的行山網站

  • 2016-12-15
  • 6371


話說有返十幾二十年行山資歷,年紀又唔係太大的話,可能都上過下列幾個行山網,果時未有Facebook,冇得話開個電話就睇住啲山友打卡,跟手問路線,好多時想知有咩路線好行點行,就係靠呢啲網站喇。

1. 賊船行旅

http://www.wildtrekking.net/

同其他資訊性網站唔同,賊船網記錄左好多路線之餘仲有好多新奇得意嘅玩法。成員各有所長,共通點係行得爬得玩得。雖然部份路線難度有啲離地,不過相片豐富加上行文幽默,論好睇程度係筆者心目中嘅No. 1,仲記得當年Print Out賊船嘅遊記出黎,配合地圖黎搵路線嘅日子。

2. 越野雄心

http://www.wildconqueror.com

可能係其中一個最早亦係最多路線嘅行山組織網站,由2003年成立至今,印象中版面只曾改動過一次,但係所記路線路量,尤其石澗之多已經去到誇張級別,時至今日,大家Google地名石澗名時,仍然可以輕易搵到雄心嘅內容。

3. 上山下海

http://go2nature.net/




討論區係千禧年最常見嘅行山問路地方,其中表表者首推上山下海,好多人就算唔參與活動唔發文都有開個帳戶用黎睇下野。唔可以唔提嘅係好多今時今日獨當一面嘅山賽參加者、山藝教練等都係上山下海嘅中堅份子,話上山下海係行山人士搖籃都唔過份。

4. 《山野之人-夜鷹》

http://www.night-eagle.com/

同上面以組織形式發表野外資訊嘅網站又有啲唔同,夜鷹相對係夜鷹前輩嘅個人行山日誌,內容除左介紹路線外亦精研奇岩怪石景點,同現今流行走馬看花玩法又有所不同。

5. 旅行家

http://www.hktraveler.com/

除左係初代行山活動嘅網站,更加係當時少有提倡親子郊遊嘅機構,初期主要提供路線資訊,及後開始加入生態旅遊團及證書課程訓練,另外更加舉辦「東北蹤走越野馬拉松比賽」,十分多元化。

6. 興SIR露營資訊網

http://hingsir.mingroy.com




露營人士必定睇過嘅網站,全香港大大小小五十幾個官方非官方營地全部走遍之外,更加用唔同嘅網絡供應商試埋各個營地收到收唔到,而且先後更三度改版營地資料全面更新,工程規模一啲都唔嘢小!

其實當年仲有好多關於行山嘅網站,可惜未能一一列出,只精選咗筆者當年作為參考嘅網同大家分享。雖然以上網站成立時「年代久遠」,但其中部份仍然保持更新,另外當睇到一啲昔日照片與今日山頭野嶺嘅現況作對比亦有另一番趣味!

最後向各位為香港山野做過記錄嘅朋友講聲多謝!


更多同類潮物



  • 訂閱內容

Top