行到隻腳生水泡,拮唔拮穿佢好?

  • 2016-12-20
  • 4347

每年咁多長跑及跑山公開比賽活動,次次比賽前都有朋友問,如果隻腳生水泡拮唔拮穿佢好?我見好多人都拮,但我盡量唔會比佢穿。

了解水泡真面目

其實水泡屬於一級燒傷,因為腳皮在鞋筒內磨擦造成,加上熱力及受潮所產生,好大程度都係因為腳汗令到潮濕,間接令腳皮發漲增加磨擦。水泡內的「水」係身體要放啲組織液出嚟去保護返果個位置,皮膚再生過程中水泡中的組織液會逐步地被吸收,同時表層逐步乾燥脫落,而下層皮膚再生成為外層皮膚。

如果係比賽中途出現水泡,在急救理論上就會話唔好俾佢穿,盡量減低傷勢惡化從而令參加者能夠繼續比賽。

進行水泡刺穿有兩個問題,第一係「燒傷」部份失去液體作保護,咁患處就會直接受壓而仲傷,有機會令深層的皮膚傷上加傷; 第二係細菌感染,由於刺穿後代表有傷口存在,最怕係發炎甚至會日後引發香港腳之類問題就手尾長,所以係不建議自己破穿水泡。

急救處理
1. 如自行處理的話,患者要先保護傷口免得再過度磨擦, 例如用厚厚的花士令搽上作潤滑, 腳趾位就貼上膠布; 如腳掌大大舊的水泡就墊上厚敷料; 此外市面亦有專門比水泡用的水泡貼片 Moleskin— 用於治療水泡、預防傷口感染, 但就比較貴同單一用途,比較少會納入急救包內。
2. 如果水泡面積已經過大,甚至隨時有可能破裂,在醫護人員判斷下用針筒刺穿抽取。曾經於毅行者當更時都有見過咁做,但此做法就只限於靚女護士出手,一般急救員係不能用針筒作刺穿。最盡都係抽大約一半水,留返部分做緩衝,之後再包紮。

當然,正所謂防患於未燃,未出事前先保護先至係王道,預防水泡重點都係上面有提及, 就係減少磨擦, 降低濕度。

減少磨擦
搽定花士令係腳掌腳趾腳根所有有機會磨到的位置;減少腳掌係鞋筒內磨擦,即係一對合size的鞋,不能過大過鬆令腳掌有太多空間走動,又不能剛剛好或過細, 因為要預少許空間係比賽中後段時俾腳皮發漲而增加磨擦位;第三係拉緊鞋帶,制動返個腳掌移動;

降低濕度
比較直接的做法係定時換返對襪, 即時吸曬腳汗的換走令到腳掌濕度減低。至於著咩襪先啱呢?近年各大品牌都有出專業級數的跑襪, 跑步重點就一定係簿同埋透氣,而行山就倒返轉, 將受力位置加厚如前腳掌腳趾腳根作為緩衝, 中掌位就簿返啲作透汗;

另外就係穿著較透氣的跑鞋,大多專業山賽跑手都會認為透氣,輕先係王道,相信大多都係因為痛過方知情重吧,所以好少會聽到佢地會選擇防水鞋款。當然亦要視乎路況及路線長短而定。

最後都講下,有高手就覺得拮唔拮穿水泡係視乎水泡的大小和成熟程度來定。如果是小水泡,裏面的水也不多,最好不要挑破,能忍則忍,或者等它長大點兒再說。但是如果是個大泡,或者成熟度高(皮薄水多),就會果斷整穿放水,只要水出來之後,佢地覺得咁會好得快啲,時間許可就貼一口膠布。挑破水泡,開口、放水,然後撫平傷口基本就ok。其實組織液都帶一點粘性,很容易把傷口密封,你就只要等着外層水泡皮自然長好脫落就行了。但相信過程會有一下忍痛過後解脫的快感。

更多同類潮物



  • 訂閱內容

Top