郵輪去台灣,食玩瞓就係咁簡單 - 海洋航行者號介紹

  • 2016-07-28
  • 海外野遊
  • ✸ 親子路線
  • ✸ 水上活動
  • ✸ 長途行程
  • 台灣
  • 3704

咁多年黎,都叫做試過硬卧長途巴30小時、無助火車18小時,飛機去旅行就唔駛講,今次就一嚐郵輪玩法,坐食水好深嘅14萬噸、可載客3800人(未計工作人員) 嘅海洋航行者號來一次台灣之旅。

原來說穿了喺船上就係食玩瞓,唔怪得子華gor話:「唔駛搵食,一日到黑淨係等食,你話幾浪漫?」 置身船上諗起呢一幕,真係好有共鳴。

▼晏晝11點半去到九龍灣德福,等大約十分鐘一班嘅86小巴,坐20分鐘就到,20分鐘入面有15分鐘係用黎塞車嘅,冇計,成架海洋航行者號有3800個乘客,如果同一個時間入啟德郵輪碼頭即係成個屋村大遷徙咁款,所以時間都唔好預得太盡。

▼落船去搵安達旅運柜位,簽幾個名就排隊過安檢了,行李駛唔駛寄倉主要睇行李大小而定,細喼可以就咁上,除左每間房只可帶兩支紅酒/香檳之外都冇咩特別野唔帶得上船,咁當然你帶啲犯法野上去就已經離題了。




▼登船之前就要出示信用卡,用黎Link Up房卡,除左賭場要美金CASH即科水之外呢幾日上船落船出入房買野都靠佢喇。

▼我地住8樓單數號皇家大道景觀房,個窗係望樓下5樓皇家大道,同雙數號比就冇海景露台,不過冇所謂啦,因為之後無論食飯定做GYM都係望海,可以保證你睇到心曠神怡。




▼返房Hea哂啲野出黎我地就同半架船嘅人一齊中個大伏,11樓主餐廳覓食,可能真係太多人同步來醫肚,等到腳軟。好在只係今次要等下位,建議呢個上船時間都係去5樓攞個三文治食算了,因為你應該仲有十餐八餐喺度食,唔駛心急。

野食又真係幾好食,除左冇海鮮刺身果啲,食物同大酒店Buffet都冇咩分別,之後幾日嘅野食都日日有啲唔同,甜品仲餐餐都有四五種,個人認為冇咩欺場。(順帶一提,雪糕機設於餐廳外右邊出口,我第四日先知,好不開心。)

▼食完周圍參觀下,大家要記得睇個船頭船尾個牌,如果調轉左會行多好多冤枉路。



正所謂民以食為天,要喺船上生存,咁梗係要食野啦。

先介紹一下幾間有食過嘅餐廳

▼帆船自助餐廳 > 免費,早午晚都有Buffet 供應,我地呢個6日5夜嘅Trip已經食左8次

▼藍寶石主餐廳 > 都係免費,不過因為限時入坐,第一次去時見排隊排到上一層,所以駛出放棄技,第二次早啲去排先入到去。

▼Giovanni's Table 意大利餐廳 >收費,有高級餐廳Feel




皇家大道咖啡廳 > 免費,最吸引之處係24小時開放,玩到唔知幾點都仲可以黎食個三文治,另外,唔想煲水的話可以黎呢度斟水同咖啡同奶。

R吧 > 好清靜嘅清吧,三互知己睡前飲一杯最啱。


繁星酒廊 > 有舞池,可以Non-stop咁「共之共共之」,不過有一次上來時大媽在跳大媽舞。



露營地點一覽

海洋航行者號運動設施

食飽就瞓唔係唔得,仲好爽添,不過既然困住左喺度,都係做下運動好,一於睇下有咩可以消耗一下過量吸收嘅「大卡」。

▼甲板衝浪 - 係咪玩水人士都啱,起碼唔會浸親

▼露天跑道 - 早晚時間都見有唔少人喺度跑步

▼攀石牆 - 相信上到頂望返落黎會好High




▼籃球場 - 個籃框好矮,稍一不慎就會入錯樽。

▼Golf場 - 我諗好多人都會有一股衝動直接打落海,不過真係諗下好喇

▼GYM ROOM - 全部跑機都係望海,唔知跑得半個鐘都望住個海個人會唔會迷左。



▼泳池 - 有大細水池,熱起上黎去浸下一流

海洋航行者號文化及娛樂設施

唔太好動嘅,都可以搵啲靜態嘅活動。

▼Art Gallery - 可以隨意購買名畫

▼賭場 - 無想像中咁大,相信係比乘客過下手癮咁解



▼皇家大道 - 真係有啲氣勢,第一眼有啲比佢個氣勢拋窒左。呢度有Duty Free Shop 同其他商店。

▼機鋪 - 可以鼓勵小朋友唔好成日對住IPAD,有時都要打下街機先得架



露營地點一覽

▼康樂室 - 喺正圖書館下方,一邊睇書一邊聽人打牌呢個經驗唔係成日有

Join團仲有個好處就係可以安排一啲特別嘅行程比你,好似今次安達旅運就安排左參觀船長室比我地,不過要深入呢個全架船最重要嘅地方都唔容易,要男左女右企埋一面咁逐個搜身,真係好安全。

入到去覺得比起睇電視成日見嘅機司室大好多倍,應該幾爽下,入去之前以為一定有嘅紅色自爆掣完全唔見,相信係收埋左。



除左食同玩,其實仲可以睇戲同睇表演,11、12樓甲板夜晚會播電影,有一晚我都睇左半場小泰山,而且睇嘅人都唔少。另外仲有魔術同溜冰表演,留意演出時間同收費就OK。



露營地點一覽

▼同場有時又會變左舞池,你睇大家跳得幾咁開心,簡直開心到樂而忘返。

上落船安排

我地係六日五夜香港至台灣之旅,簡單啲講就係香港>高雄>基隆>花蓮>香港,即係一共要上船四次落船四次,第一次上船時護照會比船員收左,到返香港之前果晚先比返你,所以就要你帶定張影印本,船上海關會幫你蓋印證明,呢張影印本每次落船都聲稱要跟身,不過我地就只係第一次在高雄落船時出示過,其他時間都係Show房卡就OK。


上船之前都有諗唔知會唔會暈船浪,不過坐足咁多日基本上都冇Feel到過有浪,相信係因為隻船真係太大,大到成個島咁,唔係上甲板望到船尾浪都唔知架船郁緊。

今次係全新嘅旅遊體驗,香港人去台灣旅行都唔係咩新鮮事,坐船去又真係好唔同。感覺上上船果刻個旅程已經開始,一直返到香港落船果刻先完成,即係話就每分每秒都用哂黎玩。




最後建議郵輪玩法唔好太貪心,事關由登陸嘅碼頭去到市區或者景點都要啲時間,而每次上岸時間大約係五至八個鐘不等,如果想要好似平時飛機去咁跑景點,應該會攰極而亡,反而喺碼頭周邊搵啲特別地方去會玩得更爽皮。

之前以為郵輪玩法只係啱上左岸嘅退休人士,而家我會大膽講句,咁多野玩,只怕你冇咁好精力玩哂所有野,一定唔會悶親。

#下次會講到由安達旅運安排嘅《非凡破風之旅 單車 X 郵輪》,會喺花蓮同前香港奧運代表蔡其皓 及 台灣單車環島達人-蛙大 一齊踩單車!

更多同類遊記



  • 訂閱內容

Top