至激溪降體驗! 5大關卡試你膽量

  • 2016-09-21
  • 西貢、清水灣及馬鞍山
  • 2092

遊記分類: 西貢、清水灣及馬鞍山
難度分數:
遊記簡介: 巡例抓住夏天嘅尾巴,中秋正日冒住返唔到屋企做節嘅危險,搵埋未行過澗嘅Jasmine用溪降方式勇闖馬大石澗。呢個實驗係測試一下石澗新手玩溪降得唔得。..


【至激溪降體驗!影片全紀錄】

去到九月中,巡例抓住夏天嘅尾巴,中秋正日冒住返唔到屋企做節嘅危險,搵埋未行過嘅Jasmine一跟Wilday教練阿衡用溪降方式勇闖馬大石澗。呢個實驗係要測試一下一個石澗新手玩溪降得唔得。

以前去馬大玩都係由富安花園起步一直殺上去,今次反其道而行,由燒烤場起步入村,由上游起步一路玩落去。

未起步先要聽一輪講解,大家都好留心,跟手著哂啲裝備上身就行喇。

行十分鐘唔夠就落澗,因為已經預哂係全身落水,完全冇得猶豫,一野就開始澗水行,教練就問我地熱好身未,原來5個關卡嘅挑戰挑戰已經等緊我地喇~

第一關 瀡滑梯 驚嚇度 **



行澗就行得多,去到啲行唔到嘅位通常都入山路繞過去啦梗係,而家先知原來睇落直不甩嘅大石,配埋合適裝備可以就咁瀡落去,唔只話正面瀡,仲有仰臥式咁瀡。由一米石開始瀡起一路瀡到三米高嘅石,三米果舊都見Jasmine驚驚地,諗左一陣就成功Sir左落黎。

第二關 飛簷走壁 驚嚇度 ***

一舊斜哂嘅石都可以當做路黎行,仲可以跳到遠一遠添。我覺得呢下已經進入左酷跑嘅領域。呢關亦難唔到有做開運動嘅Jasmine,順利跳到教練個位。

第三關 突入小瀑 驚嚇度 ***

唔用繩憑住肉體隻身衝落條瀑布仔度,Jasmine話一落水已經感受到水流嘅力量,每一步都要Hold得好實,最後捐過埋呢舊唔知點解會喺度嘅石底,呢個Mission又Completed!



第四關 瀑降 驚嚇度 ****

呢個係成個Trip 嘅精髓,要用哂全套身上嘅裝備同埋教練細心講解先攪得掂!英雄瀑目測都成十米高,喺中心穿越呢個瀑黎講,瀑降大概係唯一方法!呢一關玩原來冇睇咁險,不過就要承受條大瀑沖落身嘅打擊,大家都一一通過。



中途加插游繩小任務一個 驚嚇度 N/A

正所謂上山容易落澗難,好多時三爬兩撥爬到上去嘅位,要落真係好難攪,今次用Abseiling落就好穩陣,呢一關冇咩心理壓力,就當熟習下套架餐好了,全程聽得最多係「A住自己」。

第五關 攀石跳水 驚嚇度*****



露營地點一覽

玩完唔驚多嚇嘅游繩下降,眼前突然出現十級驚嚇位,就係跳潭,有人會驚跳落黎果下,小記最驚係爬上去果下太慢比會隊友們鄙視。教練在此有溫馨提示比大家 - 記得唔好擘大對腳,不過唔肯講原因,承受過果種痛嘅朋友一定明佢講咩。

見到Jasmine掙扎左一陣,突然就跳左落黎,睇黎佢已經覺悟了。

教練阿衡表示其實各個關卡都係由參加者自行決定玩唔玩,但係以小記觀察所得,各位朋友都會用自己嘅方式鼓勵你,尤其是跳潭果下,可以話你愈緊張佢地愈High,應該話愈落力鼓勵先真。

玩完全日溪降體驗,得到嘅結論係你幾大膽都好,有啲野原來有人教又有裝備先可以做得到,更加重要嘅係,等教練示範左先,佢冇事,自己就可以放心一跟。Jasmine就話一玩即上癮,已經約緊下次去難度高啲嘅屏南石澗再挑戰自己!

延伸閱讀 - 《衝三小》教練講解 - 溪降活動係咩玩法?


更多同類遊記



  • 訂閱內容

Top